ਤਾਜਾ ਖਬਰਾਂ
ਓਮਾਨ ਦੀ ਖਾੜੀ ਵਿੱਚ ਅਮਰੀਕਾ ਵੱਲੋਂ ਕੀਤੀ ਗਈ ਸਖ਼ਤ ਸੈਨਿਕ ਨਾਕਾਬੰਦੀ ਨੇ ਈਰਾਨ ਦੀ ਆਰਥਿਕਤਾ ਦਾ ਲੱਕ ਤੋੜ ਕੇ ਰੱਖ ਦਿੱਤਾ ਹੈ। ਅਮਰੀਕੀ ਰੱਖਿਆ ਮੰਤਰਾਲੇ 'ਪੈਂਟਾਗਨ' ਦੇ ਹਵਾਲੇ ਨਾਲ ਸਾਹਮਣੇ ਆਈ ਇੱਕ ਰਿਪੋਰਟ ਮੁਤਾਬਕ, ਤੇਲ ਦੀ ਕਮਾਈ ਰੁਕਣ ਕਾਰਨ ਈਰਾਨ ਨੂੰ ਹੁਣ ਤੱਕ ਅਰਬਾਂ ਡਾਲਰਾਂ ਦਾ ਭਾਰੀ ਨੁਕਸਾਨ ਉਠਾਉਣਾ ਪਿਆ ਹੈ। ਅਮਰੀਕਾ ਵੱਲੋਂ ਇਹ ਕਾਰਵਾਈ ਤੇਹਰਾਨ 'ਤੇ ਆਰਥਿਕ ਦਬਾਅ ਵਧਾਉਣ ਲਈ ਕੀਤੀ ਜਾ ਰਹੀ ਹੈ ਤਾਂ ਜੋ ਉਸ ਨੂੰ ਜੰਗ ਖ਼ਤਮ ਕਰਨ ਲਈ ਮਜਬੂਰ ਕੀਤਾ ਜਾ ਸਕੇ।
'ਐਕਸੀਓਸ' (Axios) ਦੀ ਰਿਪੋਰਟ ਅਨੁਸਾਰ, 13 ਅਪ੍ਰੈਲ ਤੋਂ ਸ਼ੁਰੂ ਹੋਈ ਇਸ ਨਾਕਾਬੰਦੀ ਕਾਰਨ ਈਰਾਨ ਨੂੰ ਹੋਣ ਵਾਲੀ ਲਗਭਗ 4.8 ਅਰਬ ਡਾਲਰ ਦੀ ਅਦਾਇਗੀ ਰੁਕ ਗਈ ਹੈ। ਜਾਣਕਾਰੀ ਮੁਤਾਬਕ, ਈਰਾਨੀ ਕੱਚੇ ਤੇਲ ਨਾਲ ਲੱਦੇ 31 ਟੈਂਕਰ ਓਮਾਨ ਦੀ ਖਾੜੀ ਵਿੱਚ ਫਸੇ ਹੋਏ ਹਨ, ਜਿਨ੍ਹਾਂ ਵਿੱਚ ਕਰੀਬ 53 ਮਿਲੀਅਨ ਬੈਰਲ ਤੇਲ ਮੌਜੂਦ ਹੈ। ਅਮਰੀਕੀ ਫੌਜ ਨੇ ਹੁਣ ਤੱਕ 40 ਤੋਂ ਵੱਧ ਅਜਿਹੇ ਜਹਾਜ਼ਾਂ ਦਾ ਰਾਹ ਬਦਲ ਦਿੱਤਾ ਹੈ ਜੋ ਪਾਬੰਦੀਸ਼ੁਦਾ ਸਾਮਾਨ ਜਾਂ ਤੇਲ ਲੈ ਕੇ ਜਾ ਰਹੇ ਸਨ। ਇਨ੍ਹਾਂ ਵਿੱਚੋਂ ਦੋ ਜਹਾਜ਼ਾਂ ਨੂੰ ਅਮਰੀਕੀ ਸੈਨਾ ਨੇ ਪੂਰੀ ਤਰ੍ਹਾਂ ਜ਼ਬਤ ਵੀ ਕਰ ਲਿਆ ਹੈ।
ਈਰਾਨ ਲਈ ਸਥਿਤੀ ਇੰਨੀ ਗੰਭੀਰ ਹੋ ਚੁੱਕੀ ਹੈ ਕਿ ਜ਼ਮੀਨ 'ਤੇ ਮੌਜੂਦ ਉਸ ਦੇ ਤੇਲ ਭੰਡਾਰਨ ਕੇਂਦਰ (Storage Facilities) ਆਪਣੀ ਸਮਰੱਥਾ ਦੀ ਅੰਤਿਮ ਸੀਮਾ ਤੱਕ ਪਹੁੰਚ ਗਏ ਹਨ। ਤੇਲ ਦੀ ਨਿਕਾਸੀ ਨਾ ਹੋਣ ਕਾਰਨ ਈਰਾਨ ਹੁਣ ਆਪਣੇ ਪੁਰਾਣੇ ਸਮੁੰਦਰੀ ਜਹਾਜ਼ਾਂ ਨੂੰ 'ਫਲੋਟਿੰਗ ਸਟੋਰੇਜ ਯੂਨਿਟਸ' ਵਜੋਂ ਵਰਤਣ ਲਈ ਮਜਬੂਰ ਹੈ। ਅਮਰੀਕੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ "ਬੇਮਿਸਾਲ ਆਰਥਿਕ ਦਬਾਅ" ਈਰਾਨ ਨੂੰ ਗੋਡੇ ਟੇਕਣ ਲਈ ਮਜਬੂਰ ਕਰਨ ਦੇ ਇਰਾਦੇ ਨਾਲ ਬਣਾਇਆ ਗਿਆ ਹੈ।
ਨਾਕਾਬੰਦੀ ਦੇ ਡਰੋਂ ਕਈ ਟੈਂਕਰਾਂ ਨੇ ਹੁਣ ਚੀਨ ਤੱਕ ਤੇਲ ਪਹੁੰਚਾਉਣ ਲਈ ਲੰਬੇ ਅਤੇ ਮਹਿੰਗੇ ਬਦਲਵੇਂ ਰਸਤਿਆਂ ਦੀ ਵਰਤੋਂ ਕਰਨੀ ਸ਼ੁਰੂ ਕਰ ਦਿੱਤੀ ਹੈ। ਅਮਰੀਕੀ ਪ੍ਰਸ਼ਾਸਨ ਇਸ ਸਥਿਤੀ ਨੂੰ ਇੱਕ ਵੱਡੀ ਰਣਨੀਤਕ ਜਿੱਤ ਵਜੋਂ ਦੇਖ ਰਿਹਾ ਹੈ, ਜਦਕਿ ਦੂਜੇ ਪਾਸੇ ਦੋਵਾਂ ਦੇਸ਼ਾਂ ਵਿਚਾਲੇ ਸ਼ਾਂਤੀ ਵਾਰਤਾ ਪਹਿਲਾਂ ਹੀ ਕਈ ਕਾਰਨਾਂ ਕਰਕੇ ਰੁਕੀ ਹੋਈ ਹੈ। ਮਾਹਿਰਾਂ ਅਨੁਸਾਰ, ਜੇਕਰ ਇਹ ਨਾਕਾਬੰਦੀ ਲੰਬੇ ਸਮੇਂ ਤੱਕ ਜਾਰੀ ਰਹਿੰਦੀ ਹੈ, ਤਾਂ ਈਰਾਨ ਦੀ ਵਿੱਤੀ ਹਾਲਤ ਹੋਰ ਵੀ ਨਾਜ਼ੁਕ ਹੋ ਸਕਦੀ ਹੈ।
Get all latest content delivered to your email a few times a month.
